Patumbalik sa Hinagpis

Kung Maaari Lang Sana

2011-06-04T21:10:00.000-07:00

Kung maaari bibilangin kong iyong mga pilikmata,
pagmamasdan mga busilig mo na parang may pinagaaralan akong mundo,
paglalakbayin mga daliri ko sa iyong labi
at luwalhati ang mapahinto sa mga kanal nito,

Kung papahintulutan mo,
Papahintulutan kong sarili ko
Na hawiing buhok mo
At ipakiusap ang labi ko sa tenga mo
Na baka sabik sa mga katagang nakatupi
Sa ilalim ng aking lalamunan.
Patawarin lang aking mga palad kung manginig,
Nais lamang nitong mabalani sa iyong mga ugat.

Para akong paganong nagkulong sa kweba
Na sabik sa liwanag at pagkupkop
Ngunit nabubusog lamang sa mga kwento
tungkol sa malayo,
Sa mga malayo.

Kung buksan mo akong aklat sa ibang wika
At nais intindihin,
Kakalungin kitang kagat labi’t
Pikit mata
At maghihintay...
sasambitin ko lamang pita ng aking puso
Kung tatanungin mo ako.

Pananabik

2010-02-08T23:49:00.001-08:00

Hinahanap ko ang mga daliri mo sa aking mga utong,

Mga ulap na nagpapakalma sa nililitid na mga bulkan,

Soloista,

Panay ang pausok

Madilim na sulok,

Ang haba ng panahon ay haba ng panggagalaiti,

Pananabik ay isang dagat na mainit pag sinuong,

Imahinasyon ang gubat ng mayayaman,

Soloista,

Mamaya saluhan mo ng biyolin mo

Ang chopin ng gitara ko.

Pita

2010-02-05T17:37:00.000-08:00

Pita kong makita ang pulupot ng mga braso,

Marinig ang impit na hagighik,

Ang mga patagong kiliti,

Panakaw na halik,

Mga bulaklak na kapwa nagmamasid

Sa liwasan na isang sinehan

Kung saan laging pinapalabas

Ang nakaraang inaasam.

Kinain ng Galit Isang Gabi

2010-02-01T07:30:00.000-08:00

Ahas ang gabi na bumubura sa mga kalatas ng mga bituin

Mahaba ang Cormidal na ang hantungan ‘di alam,

Lagpasan lamang mga anino sa aking parang nakadamo,

Asong galisin, may deka-deka na ang kamay nakasuksok sa bulsa,

Pinili kong ‘di tumawid sa kabila,

Pakialam ko sa mga wala ring paki,

Mabilis ang oras sa mabagal kong paglalakad,

Walang kapaguran ang relo

Wala akong kamatayan,

Usok ng sigarilyo ang aking hininga,

Naghahanap ng tumana,

Ng babaing malungkot na naghahanap ng damo,

Marami akong alam na damuhan,

Alas onse, nasa labas ang mga malilibog,

Ang mga parapadyak na ang alak ay kantot,

Mga buwayang bugaw,

Ang dagat sa malayo walang naniniwalang iyon ang kausap

Kong naghihintay sa aking biglang nakaisip,

Walang naniniwala

Paki ko sa mga walang paki.

Yosi

2010-01-07T20:13:00.001-08:00

Ang usok ng sigarilyo,

Naglubid ng makakapal na ulap,

Makakapal na ulap

Na pumulupot sa aking leeg,

Humihigpit

Habang aking paghigop tunog ng tren

Mabilis

Pabilis.

Paghahanda sa Umaga

2010-01-07T19:52:00.000-08:00

Sa umaga ang panalanging mas malambot pa sa unan,

Pagtimpla ng kape o tsaa pagkatapos,

Sa pagitan ng mga higop, mahahabang buntong hininga,

Nais makakita ng mga bulaklak

Nais makakita ng mga ulap,

Nais maamoy ang langit,

Darating ang kasagutan sa hulagway ng mga anghel,

Pagkislap ng balintataw,

Ay tanda ng simula,

Walang mahabang araw sa nakabaluti

Walang kalawang na kakapit

Sa gintong puso’t isip.

Kung aalis ka…

2009-11-24T23:08:00.000-08:00

Kung aalis ka,

Sigurado kukunin mo ang lahat

Kahit sabihin mong iiwan mo ang larawan mo,

Ang paborito nating baso,

Ang pinagsasaluhang unan,

Kung aalis ka,

Ako lang ang maiiwan,

Kahit naririto lang ang kwarto,

Ang tsinelas na parehas nating ginagamit

Sa paglilimayon sa duon at diyan

Sa pag-iipon ng mga alalala,

Ang mga ala-ala,

Marahil pag-aari ko sila

Ngunit sa iyo rin sila,

Kung sabihin nating ako nga lang mag-isa,

Gaano katotoo na masasabi mo

Na ikaw na lang mag-isa

Sa paglabas mo ng ating silid?

Bakasyon

2009-11-24T23:01:00.000-08:00

Hindi ko kilala ang bughaw

Na ulan sa likod ng kalimbahing tinang mga ulap,

Ang usok ng kape

Ang kulay ng mundo,

Unan sa aking hita,

Aso sa aking paa na dumidila,

Ang tamis na naiwan sa dila,

Mamaya,

sa kalsada

magpupunuan kami ng pagkukulang.

Lingo,

Kailangang bigyan ng oras ang sarili

Upang di maisip ang lubid,

Ang kapangyarihan ng kutsilyo

Na patigilin ang oras,

Ang lakas ng bato

Na pwedeng magpatigil sa lahat.

Ngayong bakasyon

Sa pagkahaba habang anim na araw

Susulitin ko,

Magiging makasarili

Para abutan pa ng lahat

Upang makapagpasaya kahit isa lang

Sa paraang alam ko.

Masdan mo ang kapaligiran

2009-06-17T19:49:00.001-07:00

Pinanuod ko ang aking isip

Sa harapan ng isang maulan na bakuran,

Maya maya ang ilanlang ng tuwa ng aking tiyan,

Isang hanging lumalabas sa aking lalamunan,

Pagkatapos gahasain ng aking dila

Ang masarap na ulam at panghimagas

Na ginawa ng aking asawa.

Dinilaan ko ang mantika at alat na nakabakas sa gilid ng aking labi,

Pati ang aking ngalangala lagi kong binibisita

Habang pinapanuod ang pagyuko ng mga dahon sa halik ng ulan,

Nanunuod sila ng telebisyon sa likod,

Sila na ang pahimagas ay noon time show.

Maulan na hapon,

Balani ang siesta,

Katabi lumapit na asawa,

Hininga ko ang hanging lumapit,

Pero kailangan ko pang hugasan ang plato,

Sabat ng aking isip.

Mabigat ang aking paghinga aking napansin,

Kaya ‘di na muna ako nagtimpla ng kape,

Amoy kabaong ang dala ng alaala ng inuming pait

Na sa totoo laging kinasasabikan ng lalamunan at imahinasyon

Na mapaglarong isip.

Kung mamamatay ako ngayong oras ding iyon,

Kung makalimutan kong ‘di ako ang katawan at ang isip,

Marahil romantisismo ng maisip ko ang kanta

Ng asin na, masdan mo ang kapaligiran.

Sa aking muling pagharap sa probinsiyang siyudad

2009-06-17T19:47:00.002-07:00

Nalupig puso ko ng usok sa sasakyan

Sa tuwing pupunta ako sa kanto at magmamasid,

Ang kariktan ng Tabaco tulad ng San Juan,

Abuhing ulap na nanlalabo,

Mga paang ‘di mahabol ng mata pag alas-singko,

Mga babaeng ang pusod at hita nangaanyaya ng dama,

Ang init ng katawan dulot ng alinsangan,

At ingay na nakaririndi na nakasanayan,

Nakaligtaan ko na rin yatang magtanong sa sarili

Kung kaligayahan akin pang natutuntungan.

Pangarap ko nuon manirahan sa probinsiya,

Para sa ikakagaling ng diabetis ni papa,

Para mabawasan ang pangungunsumi ni mama sa tindahan,

Magkaruon ng mga kaibigan na sa akala ko kalinisan ang alam,

Nasa puso lang pala ng tao ang kasagutan,

Ang desisyon kung tatagay o gagawa ng usok,

Napakabilis ng panahon, inaamin ko

Bagama’t inamin ko na ito ng isang libong beses

Sa nakaraang walong taon.

Ngayon, sanay na ako rito,

Wala na sa mapa ng puso ang mga dating lugar,

Mga pangalan ng mga taong nakabungguang balikat

Pati kadikitang sikmura

Kahit sila’y naririyan pa rin.

Kondisyon na ako sa paninirahan sa Tabaco,

Oo nga’t siyudad

Pero mas mabagal pa rin ang oras dito,

Dito na kaya ako papawian ng buhay?

Dito na ako nakapagasawa,

Dito na kaya matatapos ang aking alamat,

O ako’y bibiyahe pa sa isang mas matahimik na gubat?

Hindi ko alam

Pero sa paglabas ko muli ng bahay,

Sa aking malayang oras,

Sa aking pagtapak sa balikat ng probinsyang siyudad,

Hihinga ako at muling tatanggapin ang tadhanang ginawa

At sana’y ang puso’y matuto at maging kuntentong ganap,

Ang tunay na gubat na ‘di ilahas

Ay nasa puso lamang na ang umibig ay sapat.

Ego na lalaki, pag natanto nakasusuka

2009-06-17T19:47:00.001-07:00

Kamay ng aking puso sumakal sa aking leeg,

Sa pagpigil ko ng mga salitang nais lumaya.

Sa lamesa na kung saan tahimik din ang tasa ng kape,

At tayo nagkakahiyaan dahil pinagpawisan ang hangin kagabi.

At ang misteryo ng mapa ng ating katawan, batid na.

Unang tikim, tumatak sa aking mga litid,

Tiyak aking hahanapin,

Ang hilatsa ng sarap at ang klasikal ng hinghing,

Mawawala banta ng panginginig sa gabi,

Ibang klaseng init pag ika’y wala… ang aking kumot

Pero tawad kailangan kong hingin,

Pero umalis ka maging ang init ng kape,

Na ‘di ko man lang nasambit patawad,

Hintayin na lang natin muling lamig

Baka duon umiyak ako habang nagsasanib

Ang init at lamig.

Tawad kailangan kong hingin

Para makaulit para muling matikman ang panandaliang langit.

Natanto ko ang mga kaisipang ito isang gabi,

At oo inaamin ko, nais kong maglasing hanggang lumawa aking bituka.

Antisipasyon sa pangungulila

2009-06-17T19:46:00.002-07:00

Nilapitan natin ang alon

Na tila mga batang nagugutom,

Sa salamin ng kalawakang asul tayo’y tumingin,

At ngumiti sa paglangoy ng malilit na mga isda,

Umulan pero ayaw nating umalis

Dahil ang pag-alis ay maaaring susi

Ng ‘di na pagkikita,

O anong timbre ng takot ng tinig ng isip,

Magkikita pa tayo alam ko,

Pero ako’y inanod ng panandaliang pangungulila.

Pano kung hanging lubid na sa aking leeg,

Unti-unting humigpit…

Hindi ko alam kung anong oras ako umuwi ng gabing iyon

2009-06-17T19:46:00.001-07:00

Isla ang mga ulap,

Dagat ang pagitan,

At sa gitna isang perlas,

Na nakapaloob sa isang singsing

Na may matitingkad na mga kulay.

Dagsa ng kaba sa mabalasik na hapon

2009-06-17T19:45:00.001-07:00

Pinugot ng ulap

Ulo ng Mayon,

Duguan ang langit –

Sa ilalim nito, ako

At ang tasa ng kape

Na hawak ng

Pasmado kong kamay.

Isang umaga isang umaga

2009-06-17T19:44:00.002-07:00

Dinamitan na ng araw ang daigdig,

Sa higaan wala pa akong damit sa pintong buyangyang,

Sa kusina na tanaw sa aking kamang kinahihigaan,

Sa mesa –

Ang walang takip na lalagyan ng asukal at kape,

Creamer tagasagip ka na ba ng katawan na baka lamigin?

Sa bintana masigla na ang sinag,

Sumalubong aking ngiti,

Lumabas ng pinto ang paa kong hubad,

At walang kiming hinalikan ang lupa.

Pa Naga -- PTALB ‘08

2009-06-17T19:44:00.001-07:00

Ginasgasan ng bisitang ambon

Salamin ng Philcab,

Na sumugat sa mahabang biyahe --

Sa labas mga dahon,

Mga palad ng mga nagpapaalalang kaibigan.

Kung tayo’y naging astronaut

2009-06-17T19:43:00.002-07:00

anong silbi ng kape kung umuwi ka na?

ang matandang lamesang Nara tangi kong kasama,
ang aking mga labi dinidila-dilaan ko
ninanamnam lasa ng kagabi,

malabong bughaw ang umaga,
mga ulap mahiyain sa mata.
katawan ko'y takot sa tubig
'di ko rin alam saan pupunta.

kailangan mong umalis
dahil kailangan mo ng puwang
hagggang kailan tanong ko,
ang sagot 'di mo alam.

umupo ako sa hagdanan
nagtangkang magpausok
ngunit naisip ko ang paalala mo
na ang baga ko'y marupok nang bato.

hihintayin ko na lang, darating din ito
telepono ko'y tutunog at ako ay sasagot
siguro'y nagbalik na ang linaw sa mata
kaya't ako'y maghihilamos, haharapin ang umaga.

Buwanang Bulawan

2009-06-17T19:43:00.001-07:00

uminom tayo ng red wine sa ating monsary,

may yelo ang ating baso, mainit ang ating mata,
nagtatawanan tayo na parang nasa isang isla,
singkit ang ating mata, ngiti nati'y mahaba.

alam kong alam mo, ayaw kong tumoma
alam mong alam ko, ayaw kong uminom ka,
minsan lang ito aking mahal, lilipas din ito
kaya't binasyo natin ang Frenzia, sa dakilang pananabik.

nakasakay tayo sa isang tsubibo,
palad nati'y nagdikit, labi nati'y pagkit,
luntian ang ating ilaw, katawa'y may kakaibang dilaw,
maikli at mahaba ang ating hininga, dumating ang umaga
ngumiti tayo at tayo'y buhay pa.

Pintuho sa kasagsagan ng madaling araw

2009-06-17T19:42:00.000-07:00

Kung nariyan ako,

Hinihimas himas ko ang iyong noo

At hinahaplos iyong buhok

Habang pinagmamasdan kang natutulog.

Kung nariyan ako,

Masuyo kong tinitignan ang kaamuan ng iyong mukha,

Ang aking ulo sa iyong mapagkalingang unan,

Ang iyong hininga na pugong pumapawi

Sa lamig mula sa bintana.

Kung nariyan ako,

Aawitan kita ng mahinhin,

Baka ito’y magsilbing hagdan

Sa iyong pagpanhik sa ‘sang panaginip ng mga rosas.

Kung nariyan ako,

Balani ang iyong pisnging lansones

Sa ‘king nangungusap na labi.

Kung nariyan ako,

Nasa ilalim tayo ng mga bundok,

Naghihintay ng pagdatal ng liwayway.

Kung nariyan ako,

Kumikislap aking mga luha sa dilim

Sa luwalhati ng iyong pagkasi,

Sa kaisipang may umibig sa akin.

Kung nariyan ako,

Titis aking mga busilig

Sa nakalakop na dilim.

Kung nariyan ako,

Paruparong dumadapo aking mga daliri

Sa iyong labing kampupot.

Kung nariyan ako,

Nanamnamin ko bawat saglit

Ng aking buhay kasama ka,

At kung ako’y ‘di na magising sa paghimbing,

Kakikitaan mo ako na may buwan sa labi.

Kung nariyan ako,

Hahalikan kita sa labi

At hahalikan at hahalikan

Hanggang sa muli mong pananaginip.

Kung nariyan ako,

‘di ko alintana ang badya ng anumang delubyo

O anumang babala ng kalusugan.

Kung nariyan ako,

Ako ang kapayapaan ng iyong silid,

Ang oyayi ng gabi na handog ng langit

Sa mga pusong nagmumutya at minumutya.

Kung nariyan ako,

Ang iyong buhok ay talahib

Na kumupkop sa akin

Sa mga ilahas na oras ng madaling araw.

Kung nariyan ako,

Talagang nariyan ako,

‘di isang haraya lamang ang pagnamnam

Sa laging pinipintuhong sonata na iyong paghinga.

Kung nariyan ako,

Tighaw ang aking malalim na uhaw,

Batis kang dumaloy kumalinga

Sa ‘king mga pagal na ugat.

Kung nariyan ako Lyn,

Dilat man ako,

Ako’y mahimbing.

Narito man ako ngayon,

Kasama kita…

Magkahiwalay ngunit magkasiping

Sa rikit ng pagasam

Na lahat nating dalangin magiging makatotohanan.

Punk daw si Bathala

2009-06-17T19:41:00.001-07:00

Nag-aalmusal ako,

Chocolate bar, saging, isang

Basong Milo, humihimig Mahamantra

Sa ‘king boombox

Nasa isip ko si Marcus Garvey,

Si Charles Darwin. . .

Kung dapat na masalamin ng mga

Egoy na itim ang diyos na wari

Ni Garvey, dapat makita rin

Ni Darwin and diyos niya bilang bakulaw,

Ako, ang sa aking panginoon

Nama’y stick-up, may studs, naka-DMs, nakapalibot

Sa kanya ang mga may pakpak at halong

Sina Sid Vicious, Joey Ramone, Joe Strummer

At ang mga barkada kong Mohawk

Sa Tandem, Recto na sinikwat sa akin

Ng karahasan, ang iba naman

Ng omads, shoot at smack.

Itinabi ko ang tasa, baso,

Sa gilid ng mesa,

Di halos nagalaw,

Nagtungo akong dutsa,

Katawa’y umusok

Sa dausdos ng tubig.

Pintuan ng musa ang gabi

2009-06-17T19:40:00.003-07:00

Bolang apoy ng langit,

Nanunundot ng matang puyat,

Mapa ang ngalumata

Ng pakikipagtunggali sa nakaraang magdamag,

Haraya’y kaluluwang lagalag

Kaninang alanganing oras,

Himbing ang mundo

Ngunit ‘di ang diwang nag-uumalpas,

Nag-aapuhap ng bulawang hulagway,

Kausap ang papel, ang pluma

Isang mahika ang talinghaga,

pampahupa ng lindol sa dibdib,

Ito’y droga, ito’y bagwis

Paraiso sa lantay na pusong

Nilubidan ng kariktan.

Oda sa aking ika-26 na kaarawan

2009-06-17T19:40:00.001-07:00

Masayahin ang Mayo

Pagkat kaarawan ko’y lumalapit

Na at ‘di na kita naaamoy serbesa

Ngayon ang amoy tsikong maghapo’y wala

Na, ‘di na tambutsong aking bibig,

Ilong ay ‘di na bumubugang dragon,

Ala-ala na lamang ng ‘di magkamayaw na hiyawan at biruan

Ang hatid ng mga nakakalat ng upuan,

Nais ko’y mag-isa na lang

Sa araw kung saan ako isinilang,

Umupo sa isang sulok,

Titigan ang orasan,

Tik tak tik tak. . .

‘di amoy ng lechong baboy, manok, baka,

O amoy ng toyo’t bawang sibuyas dugo

Aking nalalanghap kaibigan

Kundi kamatayan. . .

Kamatayan sa bawat paggapang ng orasan.

Masayahing Mayo

Ako’y iyong basbasan

Sa araw ng aking kaarawan,

Ipaalala mo ang nektar

Ng dahan-dahang paglisan ng kabataan,

Ikintal mo sa aking isip;

Hindi ako si Superman o si Batman,

O, oras, sana’y magamit kita ng tama

Bago pagpiyestahan ng uod,

Aking unti-unting nalulusaw

Na katawan.

Sa mga gabing 'di kita nakakausap

2009-06-17T19:39:00.001-07:00

Tumakbo ako sa dilim

upang ikubli ang liwanag

na tumatakas sa aking mga mata

at dumadausdos sa pisngi

kong disyerto at sinisipsip

ng labi kong bitak-bitak.

Umaalingawngaw ang aking hininga

sa bawat kanto ng aking silid

hanggang sa ang ugong ng bentilador

ay maglaho na sa aking pandinig.

Pumupulupot ang aking mga bisig sa unan

kong halos madurog,

sumasalampak ako sa papag,

binabyahe ko ang Taysan

na 'di umaalis sa kinaruruonan.

Mga labi ko'y nililindol

at sa dulo ng aking dila

ay ang iyong pangalan

na aking hinihimig bawat saglit.

Buntong hiningang walang hanggan

2009-06-17T19:38:00.000-07:00

Pagtakas ang pagtulog sa pait

sa kaisipang baka wala ka na

pagkatapos ng mahabang gabi.

Bulak ang kutson

bulaklakin aking kubrekama't unan,

dito nakadapa akong pumikit

sa pagtangkang lumimot sa mga maaari.

kung sakaling sa puso mo'y

ako'y magsilbing isa na lamang kasaysayan,

hagulgol ang magiging iyak ng bentilador

sa muling paglapat o paglalim mg dilim.

...iilang dilim marahil

na ang bituin ay talim,

...iilang araw marahil

na ang araw ay itim.

mamapa ang ngalumata

luluwa aking mata

ngunit iilang araw, linggo o buwan lamang

at oyayi magiging himig ng bentilador

sa muling paghalik ng dilim.

Isang sulyap sa isang maaari

2009-06-17T19:37:00.001-07:00

Gitara'y kinakalabit sa dilim,

ako'y umaawit,

tuyo ang labi,

pisngi ay malagkit

pagkatapos isipin

mga maaaring kadalihanan...

nasaan na kaya aking inaawitan?

Mahaba pang paghihintay ang bukas

2009-06-17T19:36:00.000-07:00

Hanep! Bumuka na palang Rosal

sa 'ming bakuran ngayong umaga.

Napatda ako sa paghigop ng tsaa,

kasintahan na pala kita...

tila kailan lang ang kahapon.

may itim na paru-parong dumapo sa Rosal

tila nakikipagtalik, nanatili ng ilang minuto

at dagliang umalis.

bigla ang aking muling paghigop sa tsaa,

napaso ang aking dila,

napatingala ako sa mga asul na ulap

Kung kelan lamang kita naaalala

2009-06-17T19:35:00.001-07:00

Tila nangangaligkig sa kama

nakasandal ako sa dingding

bagong gising mula sa lalim

ng pagkalimot at pagbabalik

sa hapdi ng nilumot na sikmurang

walang laman sa nilunod sa serbesa

sa madaling araw

na pagkawalang bahala.

Tinungo ang kubeta

tinitigan ako ng arinola

na sinukahan ko ng bituka,

sa haba ng malimig na batang umaga.

Dumadagundong ang kaba

biyak ang dibdib

ne beinte singko anyos na binata

na bumubulong ng Krishna Krishna...

Deliryo

2009-06-17T19:34:00.002-07:00

Sa salang madilim

Nakaupo na naman ako sa sementadong sahig

Katabi ng lamesang kinalalagyan ng telepono

Hubo’t hubad akong naghihntay ng tawag

Sa isang dalagang nagka-amnesia.

Nakabukas eladong bintana

Nananakal ang hangin

Nahihila aking mga balahibo

Epileptic aking mga kamay na may bahid ng nikotina ang mga kuko.

Umaalulong ang mga aso sa labas

Nanunugat aking mga pandama

Milyong tono ng tinig aking naririnig

Nabibitak akong lalamunan

bigla akong napahandusay

bumalandra sa upuan

bago kumalampag mga basyo

na lalong kumalat sa nagimbal na sahig

Pagkatapos ng biyahe

2009-06-17T19:34:00.001-07:00

Parang may kumakatok sa pinto

Papalakas papalakas ng papalakas

Ang dabog ng sumusuntok nang kamao sa kahoy

Ay sumasanib sa rumaragasangtubig sa gripo

Ang gilid ng aking bibig ay may bahid ng toothpaste

Isinara ko ang gripo

Huminto ang katok

Manhid ang tenga

Dahan dahan akong kumuha ng kutsilyo

Na itinago ko sa aking likod

At marahan akong lumapit sa pintuan

Aking paa ay lumulubog sa sahig

May agwat akong sumilip sa bintanang bahagyang bukas

Umupo sa harap ng nakasarang pinto

Habol habol ang hininga pawisan nag-antanda

Humagulhol ng iyak nanginginig

Ang sinag ng araw galling sa bintana

Mainit ako’y nagising

Aninag ng kutsilyo sa sahig

Aroma ng kape umaaalong hangin sa dibdib

Humahagod kamay ng minamahal

Sa pisngi kong malagkit

Peryodista

2009-06-17T19:14:00.000-07:00

Nagyeyelong kanin

Sa platong may tipak,

Instant mami ay wala nang usok,

Kutsara ay nanginginig

Sa aking bawat tangkang pagsubo.

Nagmumura ang brodkaster sa t.v.,

Kanina ‘ung sa radyo,

Malansa rin ang mga pahayagan

Na nanunundot ng mata,

Nanunusok pa ng tenga,

Saraong kabaro na naman kasi ang kinain ng lupa.

Paningin ay bumaling

At dumikit sa mga papel, libro, pluma,

Tahimik sila sa lamesang nakikiramdam.

Binitawan ko ang kutsara

Lumipat ako ng mesa

Hinawakan ang pluma

Nagsimulang magtarak ng mga letra

Sa blangkong puting lapida.

Bahala na ang Diyos,

Kailangang maisulat ang kalayaan

Sa mga pahina ng kasaysayan.

Isang Pasasalamat

2009-06-17T19:12:00.000-07:00

Minamahal kong pagpapakumbaba,

Nais kong humingi ng tawad

Sa aking sinisinta

Sa paglingon ng puso ko sa iba.

May mga gabi, araw kasi

Na kanyang yakap ayaw umalingawngaw,

Kailangan daw ng igting ng sandali

Upang ritmo ng aking paglalambing masalìwan.

May mga panahong labi ko’y inilalayo

Ng palad niyang nahihiya

Sa mapanghusgang mata ng madla

Ngunit sa paglisan ng gabi

Upang papanhikin ang binhing araw…

Aking natanto sa aking

mga intergalaktikong pagninilay

Na sa busilig ko ay tanging ako,

Ako nakatindig sa ulo ng daigdig,

Walang ibang mata,

Walang ibang tenga

Panlulumo pakiusap, sa akin ‘wag kang mahabag

At muli kong naunawaan

Na may ikinukubling tamis ang luha.

Sinta, ang paglingon ng aking puso’y

Paglingon lamang…

Ang biyayang pagkakataong magmahal

Ay ligayang ‘di matatawaran.

Kayamanan ni John at Yoko (Panganay na tula para kay Myrich Madrilejos)

2009-06-17T18:18:00.000-07:00

Ang kargahin ka at awitan ng oyayi

Maski ‘di mo ako ninong

Ay lunas sa sugat na aking tinamo

Nang aking nabalitaan

Na bininyagan ka na pala.

Isang taon na, makaraan ang unang Pebrero 4…

Saksi ako sa paghingang along matiwasay

Ng iyong mga magulang makaraang ika’y maluwalhating mailuwal

Sa Ziga Hospital , Tabaco City .

SInakbibi ka ng iyong ama sa kanyang dibdib,

Minuto makaraan ang 9 na buwang pananabik,

Direktor siyang may mata

Sa isang masaganang tadhana.

Nanlalambot ina mong tinabihan sa kama

Sa labas ng ward sa pasilyo,

Ngunit may siglang umaalingawngaw

Sa bawat testigong dibdib.

May kayamanang ‘di nakasisilaw sa ating lahat,

May mensahero ng liwanag, kayamanan

Sa mundong paaralan, kayamanan,

Kayamanan ang mabiyayaan ng mga magulang, kayamanan

Na guro sa isang buhay ng makinang.

Tandang pananong ang hinaharap

2009-06-17T18:17:00.000-07:00

Bumuka na pala ang Rosal

sa 'ming maaliwalas na bakuran

isang umaga.

Sa paghigop ng tsaa

labi ko'y napatda

karelasyon ng pala kita

nang kinalabit ako ng isang paruparo

ng biglang dumao sa Rosal,

ang pakikipagtalik

ay ilang segundo lamang

pagkaraos paruparong itim nagpaalam.

bigla ang aking muling paghigop sa tsaa,

dila ko'y natulala

napatingala ako sa mga asul na ulap,

napabuntong hininga.

Papa

2009-06-17T18:16:00.001-07:00

Kung makikita lang ninyo

Ang reaksyon ng aking itay

Habang nakahiga

sa isang pribadong silid

Sa isang pribadong ospital

Nang sinabi ng doctor

na animo’y pari sa kaputian

Na kailangang putulin kanyang kaliwang paa

Sa ilalim ng tuhod

Dahil malalason buo niyang katawan ng kanyang dugo

Dahil sa sugat na tinamo sa pagkakaapak

Sa isang maliit na bato na bumutas

Ng kanyang tsinelas, talampalakan at puso,

Malamang mga mahal kong kaibigan,

Sa harap ng isang diabetiko

Sa mismong sandaling iyon,

wala kayong reaksiyon.

Pagpapatiwakal sa murang edad

2009-06-17T18:15:00.000-07:00

Siguro, Buddhist ako nuon,

Lagi kasi akong pumipikit pag nasa tulay

Na ng Sta. Mesa ang dyip na sumusundo sa akin sa bahay

Patungong paaralan,

mga elementarya ako nuon,

at sa pagpikit ko pula ang aking nakikita

at ipinapanalangin ko

na sana ‘di na ako nabuhay.

Mga limang taon ako nuon

2009-06-17T18:14:00.001-07:00

Pagkabalikwas sa alimpungat,

Kisapmata akong pumaimbulog sa hagdan,

Tumakbo sa kusina

Agad nanguyapit sa beywang ni inay

Habang tumatagas sariwang luha:

Ma… mama, minura ko si Jesus

Sa panaginip ko...

Apple

2009-06-17T18:12:00.000-07:00

Wala siyang kapatid

Wala akong kapatid

Kaya’t kaming dalawa na lang ang magkapatid

Sa pagdiriwang ng kanyang ika-7 kaarawan

Sa kanilang tahanan sa San Juan

Masaya akong tumakbo paitaas ng hagdanan

Upang batiin siya nang

Mahulog ako’t gumulong sa sahig nasadlak.

Walang bahid ng hiya umiyak ako

Dahil sa sakit at pagkapahiya,

Lumapit siya sa akin at ako ay niyakap

Ipinagdasal niya ako kay Jesus

Na alagaan ako

Sa puso ko alam ko na

Na nais ko siyang alagaan

Kailan pa man...

Kaganapan ng isang muni-muni

2009-06-17T18:11:00.000-07:00

Inubos ko ang gabi sa pagmumuni kay Van Gogh,

Ang gabing ‘di maubos ubos nais kong ubusin sa paghahanap ng kasagutan

Sa along mananayaw ng kalangitan ng madaling araw.

Dukha ako sa panahong palos,

Binabalabalan na ng dilim ang aking natitirang lakas,

Pero shabu ang Dreams ni Kurosawa,

Nakapaglalaway ang pagganap ni Scorsese kay Vincent;

Olympian ako sa pakikipagbuno sa antok.

Niyakap ko ang aking unan,

Pero kailangan kong tumayo at ilabas ang ulo sa bintana.

Sinilip ko kung paikot-ikot ba ang liwanag ng mga bituin

Sa itaas ng mga bahay.

…ilang minuto rin bago ako muling pumasok sa kwarto

At kusang nagpatihulog sa balani ng unan at kumot.

Isang gabing classical

2009-06-17T18:10:00.000-07:00

Natusok ang buwan sa sanga ng Sampaloc,

Ang buwan na nagbibigay linamnam sa mga prutas at gulay ayon sa Vedas.

Nakahiga ako sa bakuran nuon,

Sa damuhan,

Nadurog buto sa tuhod sa nasaksihan,

Pero ang tunog ng pagkadurog ng buto sa tuhod,

Chopin!

Umuulan nuon sa labas ng bahay

2009-06-17T16:57:00.001-07:00

Tulog ang iyong ina, mahal

Idinantay ko ang tenga ko sa kanyang apat na buwang tiyan,

Alam kong narinig mo ako,

nang inawitan kita ng isang kundiman,

Kinuha ko ang mga letra sa harapang bintana ng aking isip,

Ang himig ‘di ko alam kung saan ko nakuha:

Mahal, maubusan man tayo ng pagkain,

At kung pang mayaman na lang ang kolehiyo,

Babasahan kita ng mga tula hanggang ika’y lumaki,

Upang mabasag ang iyong puso,

At ang pagpulot ng mga piraso nito ang iyong ikabubuhay.

Agad lumubog ang aking ulo sa unan,

ramdam ko ang pagyakap ng iyong ina.

Ulan ulan, isa kang guro

2009-06-17T16:56:00.000-07:00

May dalang lungkot ang basa ng lupa.

Kapag bumuhos ang ulan, walang kalsadang ‘di nababasa,

Gaano man ito katigas, lumalambot ang semento

Sa pangungulilang dala ng mga abenida kalye eskinitang tigmak

Sa nagdaan ngunit nananatiling masamang panahon.

Nagtatapang tapangan,

Nananampalataya na dibdib ko’y di magigiba,

Ng hanging humahagunot

O ng martilyo ng pait

Na nangingibabaw sa puso kong estranghero pa rin

Sa mga mukha ng pangungulila sa paligid

na isang salamin ng aking tunay na kalagayan.

Introspeksyon

2009-05-08T00:58:00.001-07:00

Ulan bumuhos ka tulad ng isang nakaraan,

Ngayong hapon

Kung saan ang dugo ko’y nakalalango,

Pabahain ang mga alaalang naligaw,

Sa iyong daluyong, sundalo akong susugba,

Sa iyong ginaw, ‘di ako mamumutla,

Mga dumi mo’y walang dalang pangamba,

Handa akong lumusong

Kung pangalan man ng daa’y katapusan.

Ang mga pait,

Na umuka sa puso,

Hindi mahihilom hanggang

Aking maisalba

Ang mga pagkakamaling nagawa.

Sulat sa isip

2009-05-08T00:31:00.001-07:00

Malabo ang tubig sa matang humarang

Upang makita ang nananawagang daan:

Pag-iingat,

Ingatan ang pusong nasugatan!

Maraming nakakasalubong

Sa mahabang pagkawala,

Aking tinig kinain ng kirot,

Sa lupa ang puso nakayuko,

Lasing sa paninibugho,

Nasaan ka, ikaw na nakalimot

Sa tagpuang mahal?

Pauwi na ako irog,

Pauwi sa hantungang hindi ko alam.

Hang Over

2009-04-16T05:34:00.000-07:00

Naalimpungatan akong may basag na kasu-kasuan,

Tuhod na yantok,

Braso ko’y nagigibang talampas,

Mata ko’y mga holeng barak,

Naipit na ‘ata si Bernardo Carpio sa aking dibdib,

Sa bintana, ang mga dahon ang kaluskos si Celerio,

Ihip ng hangin, tila pagmumura ng lamok,

28 na taon pa lamang akong bumalik sa mundo na matanda,

Sa dila ko nalalasahan ang impyerno ng kinaing linuwal,

Mga basyo sa mapanghing papag may halakhak ang amoy,

Ang simoy, mga katulad ko lamang ang magnanais lumanghap,

Ako, may puso kayang madudurog pag sa mata sila’y nanilay?

Manananghalian na, umaga pasensya,

Napanis na ang pabango sa baluktot kong kumot,

Basa ng laway na mapa ng pighati sa aking unan,

Sabaw na tulad ng pagligo sa dagat ang hanap ng sikmura ko,

Paglingap naman ang kanta ng puso ko.

Pasko Pasko, pasko na namang muli (Nasaan ako?)

2008-12-16T17:52:00.000-08:00

Nilakad ko ang kahabaan ng pagbabalik tanaw,

Pagkabalikwas sa alimpungat isang madaling araw,

Dinala ako nito sa isang pasko

Malayong panahon na ang nagdaan

At binuksan ko ang balot sa pinakahuling kahon sa ilalim ng puno ng may mga artipisyal na bituin, makaraan ang ilang linggo atang pananabik.

Sa pagpasok ng Disyembre, tuwing bababa ako ng hagdan kung saan nakatayo ang aming dalawang dekada na ata at may kataasang Christmas tree, namamangha ako sa mga ilaw, lagi. At bababa ang aking mga mata mula sa dambuhalang bituin sa tuktok patungo sa mga regalo sa paanan ng artipisyal na puno na nakabalot sa mga makikinang na papel.

Oktubre pa lang, inuungutan ko na ang aking inay na bilhan ako ng laruang robot, nais ko sana’y si Voltez V. Hindi ko alintanan ang presyo, ang pagkunot noo ni inay na ikinubli ng mapagparaya niyang ngiti. Malapit na raw ang pasko, lahat ng bagay kailangan ng paghihintay.

Kaya’t sa kada tuwina lalo na pag bagong gising at bago matulog, uupo ako sa may hagdan at uubusin ang mga sandali na walang katapusan, makikipagtitigan sa mga liwanag ng puno at pagmamasdan ang mga regalo ni inay sa paanan nito na isang hapon pagkauwi galing sa paglalaro, napansin ko na lang na nakatingin sa akin ang mga kahon na nakabalot sa makintab na papel, inaakit akong nahahalina. Mahina ako mula sapul sa mga ganitong bagay, pinanganak ata akong maikli ang pisi, ngunit nagtiis ang aking dibdib at ang aking mga maliliit na palad na hintayin ang hiyas ng bisperas.

Kung ako’y naglalaro sa labas, kung ako’y kumakain lalo na’t pag nanunuod ng cartoons at nananalo ang mga Armstrong brothers laban sa mga Bozanians, lumalapot ang aking bibig at may panginginig ang aking labi na iisa lang ang kahulugan.

Aanihin ang prutas anumang mangyari, ‘di mapipigilan ang pagpasok ng Pasko, ang pangarap makakamit, makakamit.

Bisperas – pagkatapos kumain ng hamon at keso na pinalaman sa tinapay. Busog akong umupo sa tabi ng dambuhalang punong maningning pero gutom ako, gutom sa pagnanasang makita, mahawakan at buuin ang aking robot, ang aking tagasalba.

Pwede mo nang buksan, sambit ni inay sa wakas, at mabilis ang aking mga munting mga daliri sa pagpunit ng makikinang na mga balot sa isang kaalamang mas makinang pa ang nasa loob.

Nakita ko na rin si Voltez V, at napagtanto kong may iba pa akong regalo galing sa aking mga tita at ninang na nasa malayo. Konting paghinga lang ang pagitan at muli na naman akong lumusong sa kaligayahan sa antisipasyon ng surpresang naghihintay sa iba pang mga kahon.

Mga matchbox at iba pang laruang kotse at may mga imported na tsokolate pa pala na nasa ref ang naghihintay sa aking mga pandama, naramdaman ko ang tuwa.

Lagpas alas dose – nakaupo ako sa tabi ng puno, pinagbabangga ko ang aking mga matchbox, panalo ang nananatiling nakatayo. Medyo busog pa ako. Maliwanag ang Christmas tree pero ‘di ako makatulog, hinahanap ko si mama (na nakikipagusap sa aking tita sa labas ng bahay), mayruon akong nais itanong, mayruon akong ‘di maintindihan.

Tadhanang batong gumugulong

2008-12-15T10:28:00.000-08:00

Hindi ko maipaliwanag ang aking mga hinanakit na my rima,

Ang mga dingding at kisame kakwentuhan ko sa gabi,

Tinakot mo akong di ka na uuwi

At mag-isa na lang akong makikipagbuno sa gabi,

Sinabi mong para akong batang babaeng iyakin

At mahina ang aking pangangatawan,

Nabiyak ang puso kong musmos

At ang mga piraso nito’y tinangay

Ng di nagpaalam na hangin.

Ninais kong bagtasin ang timog papunta sa hilaga,

At hanapin ang tinig kong matagal na atang nawala,

Nakita ko iyon sa iyo,

At sana’y pinapakinggan mo pa rin ako.

Sa laot ng aking puso,

nalulunod ang pag-asa,

Lumabas ka na sa pinto kung nais mo,

Hindi naman milagrong magkita pa rin tayo sa dulo.

Sa dulo na magkaparehas na ang hawak nating susi,

At ‘di na ang anino natin ang ating nakikita sa gabi,

Ikaw pa rin ang nais kong bigyan ng bubong,

Ang kumutan ng aking mga braso at dampian ng labi.

Punk days

2008-12-15T10:20:00.003-08:00

Malayo sa bahay,

Matapos ang 20 pesos na gig,

At masayang balyahan at pagsisid sa mga tao sa ilalim ng entablado,

Naglalakad ang mga makasaysayan naming 16 holes at Chuck Taylor,

Sa ilalim at gilid ng mga kaibigang anino ng naghihilik nang siyudad.

May haharurot na jeep pagkatapos ng limang taon,

At ayaw naming pumara pagkat ayaw namin,

‘di pa kami pagod sa pagbaliktanaw sa maingay ngunit masayang tugtugan

magpapalipas na lang kami ng gabi,

Sa gilid ng bangko

Yoyosi, tutungga ng gin sa plastic animo’y Sprite,

Sayang ang alak sayang ang gabi

Kalawang sa mga bum ang oras…

May mga katabi kaming batang lansangan na langit ang bubong,

May mga dumaang mga lasing at nakipagtitigan sa kapwa lasing,

May dumaang patrol car at huminto,

Nasindak na kami bago

Hiniram ang aking yosi ng bumabang parak at nakisindi.

Pulang langit sa bumbunan ko

2008-12-15T10:20:00.001-08:00

Pulang langit sa bumbunan ko,

Tumatanda ako ngunit ‘di ang anino ko

Ang mga nasusunog na kalye na nasa harapan at likuran ko

mga mapa sila ng aking puso,

pusong ‘di nagsasawa sa pagtampisaw sa tubig ng kamusmusan.

Mas matanda ako dati kaysa ngayon,

Naiintindihan ko na kasi na ang lahat ay bula,

Napadaan lang ako rito,

Napadaan upang mag-iwan ng bulaklak.

Ikinasal ako sa pagnanais na maging mabuting tao

At yun ang nagpapabata sa akin

Sana totoo ako sa aking sarili,

Aking sarili aking isip

na minsa’y mistulang ‘di ko pag-aaari

Pita kong maging musmos sa puso

2008-12-15T10:19:00.002-08:00

Nahihimbing lamang ang pag-ibig sa ating puso,

Pagmamahal na nakalimutan natin

Nang tayo’y nagpakulong sa silid-aralan at naturuan na bukal ng ligaya

Ang diploma at pagkakaruon ng magarang bahay.

Isang bula ang manirahan sa inosenteng daigdig,

‘di ko namalayan ang pagpuslit ng mga kulay ng mundo

Na napalitan ng mga humahagibis na sasakyan,

Mausok na mga siyudad,

Sanghaya ng pera,

Nakangingilong mga relasyon sa kasintahan, mga kapamilya at kaibigan

Na may mga sandaling di ko sila makilala.

Lagi nating gustong bumalik sa mundong nawala

Ngunit lagi nating nakalilimutan na huminto sandali

At magtanong kung bakit halimbawang

Umiiyak ang ibon kapag nawala o lumisan

Na ang kanyang inakay.

Patumbalik sa Tamis

2008-12-15T10:19:00.001-08:00

Gabi, nais ko na namang lakarin ang iyong kahabaan

Listo sa halik ng aking tsinelas

Sa mga makikitid na kalye, abenida, eskinita

Ng Tabaco, mula nang ika’y ginawang siyudad.

Nugnit ‘di ko rinig ang sadsad

Pagkat isip ay humahalik sa tunog ng tamis

Ng mga banal na Pangalang binibigkas ng aking bibig:

Hare Krishna

Krishna Krishna

Hare Hare

Hare Rama

Rama Rama

Hare Hare

Sa paggapang muli ng aking mga daliri

Sa aking Tulsi 108 beads,

Manaka naka’y titingin sa paligid

Ngingiti tatango ‘pag may kakilalang nabanaag

Pero isip ay nakahalik pa rin sa tunog

Na mahinay at masuyong

Sinasambit ng aking labi at pusong

Luoy, tuklap-tuklap,

Nag-aalab ang pitang humigop ng nektar

Na pampalis ng kaba

At pampakalma ng pandama.

Kundi pa ako marahang naguhitan sa leeg

Na matalas manipis malamig mahabang bagay

Isang gabi ng Oktubreng giniginaw,

Alas-Onse, eladong bombilya ng mga ilaw-lansangan ng Tomas Cabilles,

Sinaklot ng garalgal na tinig na sumulpot mula sa likod

Ang tangan kong Nokia 3310

At iniwan akong ‘di makadakot ng hininga.

Kung hindi pa…

King hindi pa iyong nangyari

‘di ko pa maaalalang panandalian lang ang lahat

Tulad ng paglakad sa gabi.

Tumatanda ako sa mga gabi na ika’y wala

2008-12-15T10:18:00.002-08:00

Tumatanda ako sa mga gabi na ika’y wala

Na nagpaparupok sa ‘king mga buto

Dahil sa paglaslas ng hangin

Maging sa isip.

Mabigat ang biyahe ng kutsara’t tinidor sa ‘king bibig,

Ang plato ng hapunan minsa’y aking natabig,

S a upuan, perpetwal pa rin akong nanalangin.

Di tulad ng pagkauhaw sa tubig

Ang pangungulila ko sa iyo,

Panlalamig ko’y disyerto

Na presensya mo lamang ang makatitighaw.

Pag-ibig mo’y narito lang alam ko,

Ibinalita sa akin ng hangin

At ng labi kong basa,

Ngunit wala pa rin akong magawa

Kundi ang namnamin na muna

Katamisang bunga ng pangungulila

Sa pamamagitan

Ng pagsulat ng mga tula...

Pangunguyapit sa pulso

2008-12-15T10:18:00.001-08:00

Kasingtahimik ng tasa ng tsaa

Humahalintulad sa gabi

Nag-aanyaya ang bintana

Ng isang mahabang paglalakbay

Di ko matanggihan ang mahabang agaw-dilim

Na nasa aking unahan

Ngayong gabi,

Hindi mababanaag ang anino kong naglilimayon

Sa maliwanag nang

Mga kalye ng Tabaco sentro.

Pangangailangan ang paglalakbay

Sa tulad kong nangungulila.

Lulan ng bus patungong Legazpi,

Ang mapagkalingang hangin

Au nagpapaalala ng iyong mga braso.

…hintayin mo ako

Sa mga gabing hinahanap kita mahal ko

Arcee, ikaw at ako ay magkaiba ngunit iisa

pansamantalang anesthesia

Pahimakas

2008-12-15T10:17:00.004-08:00

May isang pulang Rosas

Na nasa gilid ng bintana,

Na nakayuko sa dapithapon,

Na habang lumulubog ang araw,

Ang pumuputlang talulot

Ay dahan-

Dahang...

Humahalik sa lupa.

Pagsulyap sa pagtanda at pagyao

2008-12-15T10:17:00.003-08:00

Tulad ng magkayakap ng patpat

Sa rumaragasang ilog

Ang relasyon dito sa mortal na daigdig,

Payapang magkasiping

Sa kalmadong agos,

‘di alintana batong nakaharang

At pagtama ay ang paghiwalay

At manipis ang pagasang

Tinatamasang muling yakap.

Natuto akong Umawit

2008-12-15T10:17:00.001-08:00

Natuto akong umawit

‘di dahil sa pag-ibig,

Natuto akong umawit

Dahil wala akong pag-ibig.

Tulad ng aking pagsusumikap

Na makapagsaing araw-araw,

Ako’y umawit ako’y umibig.

Natapos ba ang unos?

2008-12-15T10:16:00.002-08:00

Ang mga aso, nagpapasaya sa bakuran

Na tinakasan ng mga bulaklak dala ng nagdaang unos,

Di pa nawawalis ang nabasag na paso

At mga dahong luoy,

Basa pa ang mga nilabhang damit na pinagsisilbihan pa rin

Ng sampayang sapilitang kinuba ng panahon,

Ano bang kaligayahan ang hatid ng pagsilip sa bintana,

Ito ba’y pag-asa na dala ng nasa malayong bukang liwayway

O konswelo na hatid lamang sa aking ng hinihigop kong kape?

Walang kapaguran ang ngiti ni inay, tulad ng ibang matatanda,

Sila ang mga umagang ‘di pumupusyaw,

Tila ang mga alaga akong aso na sige pa rin ang dantay ng ulo sa nanghihina kong tuhod

Kahit minsan nakalilimutan ko na silang himasin.

Nanlilimahid na ako sa isang umaga

2008-12-15T10:16:00.001-08:00

Sa harap ng bintana, silhouette ako sa langaw

Na bumisita at dumapo sa iniinuman

Kong baso ng serbesa,

Nakatanghod ako sa mesa,

Tinanong ang bisita:

Langaw langaw, ano ang ating pagkakaiba?

Lumagok pa ako ng isa at isa pa

Bago naduwal at muntik masuka.